“Bayramınız mübarək, əziz şəhid ailələri” adlı tədbir keçirildi!
30 dekabr 2023 | 15:54
Dünya Azərbaycanlılarının Həmrəyliyi günü və Yeni il münasibəti ilə şəhid ailə üzvlərinin iştirakı ilə “Bayramınız mübarək, əziz şəhid ailələri” adlı tədbir keçirildi. Rayon İcra Hakimiyyətinin təşkilatçılığı ilə Horadiz şəhərində yerləşən “Telnar” şadlıq sarayında keçirilən tədbirdə şəhid ailələri ilə bərabər Rayon İcra Hakimiyyətinin başçısı Alı Alıyev və RİH əməkdaşları, rayonun hüquq mühafizə orqanlarının rəhbərləri, qazilər, ziyalılar da iştirak etdilər.
Tədbir başlamazdan əvvəl Dövlət Himni səsləndi, Ulu Öndər Heydər Əliyevin və bütün şəhidlərin əziz xatirəsi bir dəqiqəlik sükutla yad edildi.
Daha sonra Füzuli Rayon İcra Hakimiyyətinin başçısı Alı Alıyev çıxış edərək Müzəffər Ali Baş Komandan cənab İlham Əliyevin rəhbərlik etdiyi şanlı Azərbaycan ordusunun qazandığı böyük Zəfərdən söz açdı, əsasında Ulu Öndər Heydər Əliyev siyasəti dayanan bu Zəfərə aparan yolun şəhidlərimizin və qazilərimizin qəhrəmanlıq dolu döyüş yolundan keçdiyini diqqətə çatdırdı. Bütün şəhid ailələrini səmimi qəlbdən təbrik edən Alı Alıyev 2024-cü ilin dövlətimiz, xalqımız üçün uğurlu xeyirli il olmasını arzuladı.
Füzuli Dövlət Dram Teatrının hazırladığı şou proqram şəhid övladlarının böyük marağına səbəb oldu.
Sonda Rayon İcra Hakimiyyəti tərəfindən şəhid övladlarına hədiyyələr təqdim olundu.
Keçidlər
