Şəhid Cəfərli Əli İsa oğlunun Anım günü qeyd edildi
29 oktyabr 2024 | 10:46
Şəhid Cəfərli Əli İsa oğlunun Anım günü qeyd edildi.
Anım günündə 44 günlük Vətən Müharibəsinin şəhidi Cəfərli Əli İsa oğlunun məzarı və ailəsi Füzuli Rayon İcra Hakimiyyətinin əməkdaşları, Səfərbərlik və Hərbi Xidmətə Çağırış üzrə Dövlət Xidmətinin Füzuli rayon şöbəsinin nümayəndələri, idarə-müəssələrin rəhbərləri, təhsil işçiləri və məktəblilər, rayon ictimaətinin əməkdaşları, döyüş yoldaşları, şəhid ailələri, qazilər və ziyalılar ilə birlikdə ziyarət olundu.
Xatırladaq ki, Şəhid Cəfərli Əli İsa oğlu 29 avqust 2001-ci ildə Füzuli rayonunda anadan olmuşdur. Əslən Füzuli rayonu Dövlətyarlı kənd qeydiyyatlı olan Əli və ailəsi məcburi köçkün kimi Füzuli rayonunun İkinci Zobucuq qəsəbəsinə köçmüşlər və Əli qəsəbədə yerləşən 27 saylı tam orta məktəbdə təhsil almışdır. Uşaqlıqdan arzusu tarix müəllimi olmaq olan qəhrəmanımız Suqovuşanda tarix yazmışdır.
Əli Cəfərli Vətən müharibəsində iştirak edib və Suqovuşanın azadlığı uğrunda gedən döyüşlərdə vuruşmuşdur. Əli Cəfərli 27 sentyabr 2020-ci ildə Suqovuşan istiqamətində döyüş tapşırığının yerinə yetirilməsi zamanı qəhrəmancasına şəhidlik zirvəsinə yüksəlmişdir. Əli Cəfərli 28 oktyabr 2020-ci ildə Füzuli rayonu Əhmədbəyli kənd qəbirstanlığında dəfn olunmuşdur.
Əlinin əmisi Adil Aydın oğlu Cəfərov da 1992-ci ildə şəhid olmuşdur:"Əli hər zaman deyərdi ki, hər şey vətən üçündür. Əmim vətən üçün şəhid olubsa, biz niyə getmirik? Hamı bu vətən üçün, biz hamımız bu vətənin oğluyuq. Subay idi.
Ana üçün oğlunun şəhid kimi getməyi, təmtəraqla , adlı-sanlı getməyi böyük fəxrdir.Həmişə “mən tarixçi olacağam” , deyirdi, amma özünü tarixə yazdı.
Azərbaycanın ərazi bütövlüyünün təmin edilməsi uğrunda döyüş əməliyyatlarına qatılan və hərbi hissə qarşısında qoyulmuş tapşırıqların icrası zamanı vəzifə borcunu şərəflə yerinə yetirdiyi üçün Azərbaycan Respublikasının Prezidenti cənab İlham Əliyevin sərəncamına əsasən Əli Cəfərli ölümündən sonra “Vətən uğrunda”, "Cəsur döyüşçü", “Suqovuşanın azad olunmasına görə”, Laçının azad olunmasına görə" medalları ilə təltif olunmuşdur.
Keçidlər
